БичлэгБи салхи болох нь үнэн
Ээжийн хэвлийд бүрэлдэн
Эх дэлхийд унасан минь үнэн
Эргээд өд шиг хөнгөрч
Эрээн мяраангүй хязгааргүйд хөвөх минь үнэн
Өчигдөр надаас зугтан
Уулын цаагуур урссан нар
Өглөө улайсаар
Шингэж орсон тэр газраасаа
Ширэв татан гарч ирэх нь үнэн
Маргааш хийсэх навч
Өнөөдөр шарлах нь үнэн
Мартаж чадсангүй ээ гээд
Чи худлаа шаналсаар
Өд нь зулгарсан тахиа шиг
Хүрч ирэх нь үнэн
Ганцаардлыг минь үзэн ядсаар
Ганц ч шүлгийг минь ойлгоогүйдээ
Намайг л зөвхөн буруутгасаар
Насаа тоолон өөр бүсгүйн бэлхүүсээр тэвэрсээр
Өвгөрөх насруугаа цахилах чинь үнэн
Өглөөгүүр гуагласан хэрээ
Өдөр өдрийн туулж буй бүхнийг минь
Гурван зуун жилийн дараах
Хойд төрөлд минь шингээхээр
Гялтгар нүдээ цавчихгүйгээр
Намайг ширтэн
Утасны шон дээр өнждөг нь үнэн
Ээжийн хэвлийд бүрэлдсэн минь үнэн
Эх дэлхийн өлмийд
Мөнхөд тэнгэр ширтсээр шингэх минь үнэн
Маргааш хийсэх навч
Өнөөдөр шарлах нь үнэн
Магадгүй би түүнийг хийсгэх
Салхи болох нь үнэн
Бичсэн: ulaankaa | цаг: 16:27 |
Үгийн эвлүүлэг
Холбоос | email -ээр явуулах | Сэтгэгдэл(0) | Сэтгэгдэл бичих
Холбоос | email -ээр явуулах | Сэтгэгдэл(0) | Сэтгэгдэл бичих
Сэтгэгдэл:
Сэтгэгдэл бичих
